Qəzza gündəmi MAS-ICNA ABŞ Müsəlmanları Konqresinə damğasını vurdu
Bu il 22-ci dəfə keçirilən və dekabrın 28-də başlayan MAS-ICNA 2023 Konqresi Şimali Amerikanın ən böyük konqres və yarmarka mərkəzi olan McCormick Place-də dekabrın 30-da axşam sona çatdı.
Türkiyənin Vaşinqtondakı səfiri Hasan Murat Mercanın da qatıldığı konqresdə Dr. Ömər Süleyman, Ş. Suhaib Webb, Sr. Dalia Mogahed və Ş. Yasir Qadhi kimi şəxslər natiq kimi iştirak edirdi.
Bütün çıxış edənlərin və əsas hadisələrin ortaq mövzusu Qəzzada davam edən böhran və İsrailin hücumları olub. ABŞ-ın İsrailə dəstəyinin şiddətlə tənqid edildiyi çıxışlarda və tədbirlərdə Co Bayden administrasiyası İsrailə qeyd-şərtsiz dəstək verməməyə çağırılıb.
Konqresə qatılan bir çox amerikalı müsəlman lider Bayden administrasiyasının Qəzzaya münasibətini tənqid etsə də, 2024-cü il prezident seçkilərində Baydenə səs verməyi planlaşdırmadıqlarını da bildiriblər.
ABŞ-ın müxtəlif ştatlarından on minlərlə insanın qatıldığı konqresdə İslam dünyası və Amerika müsəlmanları ilə bağlı müxtəlif mövzularda əlavə tədbirlər də keçirilib.
ABŞ-da müsəlman konqresləri
1968-ci ildə ABŞ-da hind əsilli müsəlmanlar tərəfindən qurulan ICNA Şimali Amerikadakı müsəlman qeyri-hökumət təşkilatlarını bir araya gətirmək üçün 1977-ci ildə daha əhatəli bir çətir təşkilatına çevrildi.
1993-cü ildə ABŞ-da müsəlmanları bir araya gətirmək və bütün sahələrdə mədəni fəaliyyət göstərmək məqsədilə yaradılan MAS-ın bu gün ABŞ-da 50-dən çox ofisi var.
ICNA və MAS ABŞ-da yaşayan müsəlmanlar üçün ildə iki dəfə, biri ilin sonunda Çikaqoda, digəri isə yazın əvvəlində Vaşinqton-Baltimor ətrafında ABŞ-ın şərq sahillərində yaşayan müsəlmanlar üçün çox sayda konqres təşkil edir.
